നിനക്കെന്നെയറിയില്ല...,മീശപിരിച്ച് ഉഴിഞ്ഞൊരു നോട്ടം നോക്കി ഗുണ്ട
നീ എന്നെ അറിയുന്നില്ല, ---കണ്ണ് നനച്ച് കാമുകി
എന്നെ ആരും മനസിലാക്കുന്നില്ല---..നാല്പത്തെട്ടുകൂട്ടം ജോലിക്കിടിയില് സ്വയം പഴിച്ച് ഭാര്യ
നിനക്കിതെത്ര പറഞ്ഞിട്ടും തലയിലേക്ക് കേറാത്തതെന്താണ് ---ക്ഷമകെട്ട ടീച്ചര്
നിങ്ങള് കാര്യം അറിയാതെയാണ് പറയുന്നത് ----കടിച്ചമര്ത്തിയ രോഷത്തോടെ ഓഫീസ്സ്റ്റാഫ് ബോസിനോട്
ആരും ആരെയും അറിയുന്നില്ലെന്നാണ് പരാതി. അറിഞ്ഞവരുടെ അറിവൊന്നും ഒരു അറിവല്ലെന്നാണ് തേങ്ങല്.
ഇനിയെന്റെ ചോദ്യമിതാണ് എങ്ങനെയാണ് അറിവ്?
വായിച്ചറിവുണ്ട്,കേട്ടറിവുണ്ട്, അനുഭവിച്ചറിയാം, കണ്ടറിയാം, കൂടെനിന്നറിയാം. പിന്നെയും ഒരുപടി കടന്ന് മഹാത്മാക്കള് പറഞ്ഞു ഏതൊന്നിനെയാണോ അറിയേണ്ടത് അതില് മുഴുകുന്നതാണ് ശരിയറിവ്.
ഇന്ന് ഞാന് കണ്ടെത്തിയ അറിവ് ഇതാണ്.--ഒന്നിനെ സ്നേഹിക്കുന്നതാണ് ഏറ്റവും വലിയ അറിവ്. മീശപിരിച്ച ഗുണ്ടയെ നാം അറിയും സ്നേഹിച്ചു കഴിയുമ്പോള്...കണ്ണു കലങ്ങിയ കാമുകിയ നാമറിയാം ഹൃദയം പകര്ന്ന ഒരു ചുംബനത്താല്..പിറുപിറുത്തു കലപിലകൂട്ടുന്ന ഭാര്യയെ നാമറിയും ഒരു ചേര്ത്തു പിടിക്കലില്. സ്നേഹത്തിനുമുന്നില് ഇവരൊക്കെയിത്രയേ ഉള്ളൂ .സ്നേഹിച്ചു തുടങ്ങിയാല് നമുക്കാരെയും കുറ്റപ്പെടുത്താനാവില്ല മനസിലാക്കാനേ കഴിയൂ. സ്നേഹിക്കുന്നയാളിന്റെ ബലഹീനതകളെക്കൂടി സ്നേഹിക്കാന് കഴിയുന്ന അവസ്ഥ. ഇഷ്ടപ്പെട്ടു പഠിക്കുന്നത് കഷ്ടപ്പെട്ടു പഠിക്കുന്നതിലേക്കാള് മനസില് ഉറക്കുന്നതിന്റെ കാര്യവും മറ്റൊന്നല്ല.
അറിയുകയെന്നാല് സ്നേഹിക്കുകയെന്നര്ത്ഥം. സ്നേഹിക്കുകയെന്നാല് ആഴത്തില് അറിയുകയെന്നും
അറിയുക = സ്നേഹിക്കുക!
No comments:
Post a Comment